Şəhidlər sərvəri imam Hüseynin (ə) bir sıra xüsusiyyətləri vardır ki, məhz o həzrətə məxsusdur. Həmin xüsusiyyətlərdən biri də budur ki, imam Hüseynə (ə) sevgi və məhəbbətin hərarəti möminlərin qəlbində həmişəyaşardır. Bu özəlliyi və onun qiyamət gününə qədər yaşayacağını İslam Peyğəmbərinin dilindən eşidək. O həzrət buyurur:
“Möminlərin qəlblərində Hüseynin qətlinə görə bir hərarət vardır ki, heç vaxt soyumayacaq!”(“Xəsaisül-Hüseyniyyə”, səh.70; “Müstədrəkül-vəsail”, 10-cu cild, səh.318.)
“Həqiqətən, möminlərin qəlblərində Hüseynə gizli məhəbbət vardır!” (“Xəsaisül-Hüseyniyyə”, səh.48.)
“Həqiqətən, möminlərin qəlblərində Hüseynlə gizli tanışlıq vardır!” (“Biharul-ənvar”, c. 43, səh.43.)
Bütün məsumlar fəzilətdə – elm, qüdrət, şücaət, ilahi vəzifələrinin icrasında və s. xüsusiyyətlərdə bir-birinə bənzəyirlər. Necə ki, “Camieyi-Kəbirə” ziyarətində oxuyuruq:
“...Həqiqətən, sizin ruhlarınız, nurunuz və fitrətiniz vahid, pak-pakizə, təmiz və bir-birinin eynidir. Allah sizi parlaq nur xəlq etmişdir. Sonra Öz ərşi-əlası ətrafında dövr edən halda yerləşdirmişdir. Nəhayət, sizin vücudunuzla bizə minnət və haqq qoymuşdur. Allah sizi Öz adının zikr edilib ucaldılmasına izn verdiyi evlərdə yerləşdirmişdir...” (“Mən-la yəhzuruhul-fəqih”, 2-ci cild, səh.613.)
Həmin evlər ki, Allah-Taala Qurani-Kərimin “Nur” surəsinin 36-cı ayəsində onlardan söz açmışdır:
“(Bu ilahi nur) Allahın (ad, məqam və binalarının) ucaldılmasına və orada Öz adının çəkilməsinəicazə verdiyi evlər (məscidlər və məsumların məqbərələrin)dədir ki, orada səhərlər və axşamlar Onu pak sifətlərlə mədh edərlər.”
Amma insanların imam Hüseynə (ə) eşq və məhəbbəti özünəməxsusdur. Hər il Məhərrəm ayında keçirilən əzadarlıq məclisləri, Nəcəfi-Əşrəfdən və digər məntəqələrdən Kərbəlaya doğru “Ərbəin yürüşü” bunun canlı nümunəsidir.
Mənbə. (Maide.az)
https://youtu.be/JOdssqRalws?t=441
